政情：「北區動源」執紙皮 搶拾荒者飯碗？
網上組織「北區動源」不滿水貨客搞到區內垃圾多多，呼籲北區居民尋日到上水一齊執垃圾，點知活動一小時內草草結束，據知有參與者一度執走疑似拾荒者嘅紙皮箱，分分鐘搶咗人飯碗都唔知！
搵唔到水貨垃圾堆
「北區動源」尋日發起還原上水清潔大行動，全程只有十多人參與，不過警方依然嚴陣以待，安排超過一百名警員沿途戒備，十多人行咗成個鐘都搵唔到水貨垃圾堆，沿路又有唔少清潔工打掃街道，惟有向疑似拾荒者儲起嘅紙皮箱同卡板埋手，仲執埋明顯唔關水貨客事嘅單車籃內雜物，最終就執走六袋垃圾同兩塊卡板。
代表之一賴奕龍就話畀食環署截胡，懷疑署方早過佢哋出手派人清理街道，所以街上幾乎無水貨垃圾。當問及怕唔怕執錯婆婆嘅紙皮箱，佢則稱「如果真係執錯，真係唔好意思。」