政情：學聯反普選

改革制度 似講多過做

持續七十九日嘅佔領行動，令學聯潛在問題一次過爆發，適逢學聯最近進行換屆選舉，外界對新一屆學聯領導層都有期盼，新一屆學聯領導層尋日會見傳媒，Nathan承認，學聯喺佔領期間出現人為問題，做決策時未有充分掌握同學意見，亦認同有必要改革部分制度，不過一句到尾，佢哋似乎都係講多過做。

對於一批主張退聯學生要求普選秘書處，Nathan死撐話為咗院校自主，反對普選秘書處，學聯常委柯凱齡亦有同一論調，指為咗維持院校自主，避免秘書處權力過大，學聯周年大會已經否決普選秘書處建議，至於其他改革建議會交去學界改革檢討工作小組。

至於坐擁三間物業嘅學聯學生活動基金，被批董事一職由學聯老鬼擔任，新當選學聯副秘書長黃嘉輝承認，近幾屆學聯成員因缺乏處理商業程序經驗，所以唔識去轉番個名，以致落莊十幾年嘅老鬼仍然係公司董事，佢哋已就此着手改善，早前周年大會已選出新任學生董事，亦搞緊轉名手續。

電競聰：冇時間打機

另一方面，學聯於佔領期間籌得二百五十萬元，Nathan話會用喺政改運動上，亦可能成立基金；當問及立法會表決政改時有何行動，學聯稱未決定具體方案，又計劃透過公投制訂學界約章，制訂學聯於政治、經濟等方面嘅方向。

講番新當選學聯秘書長Nathan，佢早年成日喺打機比賽做電競評述員，因此有「電競聰」外號，Nathan尋日透露，自從加入學聯後已經冇時間再打機，更加唔可以透過做電競評述賺外快，不過佢都做好心理準備，今年要同部遊戲機講再見嘞！