中環出更：現身慈善跑 羅崇文臨陣退縮
民航處被揭豪花公帑將新總部大樓打造成「豪華娛樂城」，最近再被踢爆約三千呎為「太極班」場地，供職員逢周三中午學習「耍太極」，連民航處處長羅崇文嘅太太梁婉雅亦有參與，醜聞纏身嘅羅崇文一連兩日現身公開場合，繼前日低頭急步離開迴避問題，佢尋日出席百仁基金慈善跑活動，一方面「甩底」冇落場參加親子組比賽，其後更粒聲唔出「快閃」離開。
聲稱囡囡唔知醒
羅崇文尋日原定主持鳴槍儀式後，就會同囡囡參加三公里親子組比賽，不過喺鳴槍儀式後，羅崇文冇行近跑道，反而朝出口方向急步離開，對於傳媒多次追問「太極班」一事置若罔聞，並喺現場公關護送下極速離開。據現場消息指，羅崇文「縮沙」嘅原因係囡囡唔知醒遲咗起身，真係信不信由你！
相比羅崇文臨時「縮沙」同藉口多多，百仁基金副會長林智彬於屋企人缺席下繼續完成比賽。林智彬話，太太同囝囝前晚因事好夜先返到屋企，因此決定叫佢哋瞓多陣。佢又話，於兩年前驗身時發現有高血壓，於是下定決心每日練跑，而太太負責每日都會（目及）實工人買餸煮飯，等大家食得清淡啲。
李文俊愈跑愈肥
百仁基金主席李文俊雖然都有跑步減肥，不過佢無好似其他人咁愈跑愈瘦，李太黃敏儀爆料話，老公跑步後狂食零食，所以體重不減反增。
工業總會主席劉展灝則戴住耳機參加十公里賽事，一面聽收音機嘅新聞報道，等自己一早就可以掌握世界大事。
卓妮