路牌柱彎曲 恐倒塌傷人
「嗰日返工等過馬路，望望吓見到個路牌彎咗，起初仲以為自己未瞓醒眼花花，點知後面啲人都係咁講，啲路牌彎咗都冇人整，一陣冧落嚟咁重砸親人點算？」大角咀居民蔡先生指出，嘉善街有路牌支柱彎曲多時，擔心一旦倒下或會傷及途人。
路署回覆被斥官僚
路政署發言人表示，接獲轉介後即時派員視察，確認該處交通標誌牌有破損，懷疑路牌曾被碰撞致鐵柱彎曲。發言人稱，該署隨即安排承建商更換有關交通標誌牌，工程現已完成。發言人強調，如發現道路設施有破損，會適時安排維修，保障道路使用者安全。
不過，蔡先生卻指路政署的回覆過於官僚，「次次都係答嗰幾句，我覺得好冇誠意，好似同公眾解釋都費事咁，淨係話會做好道路保養，咁點解條路仲成日咁多問題？」