開講有話，嘢可以亂食，話唔可以亂講。不過咁喎，今時今日食品安全問題多多，任何食品都可能中招，而且黑心食品冇記號，有時賣相仲靚過正貨添，市民根本防不勝防。
唔係講笑o架，食安問題鑊鑊新鮮鑊鑊甘，淨係台灣咋，繼去年底部分豆乾產品驗出含有致癌嘅染色料「二甲基黃」，上月又揭發有人用禽畜內臟潲水煉成嘅油餵豬，甚至有人出售懷疑以羽毛、尿液及糞便和禽血製成嘅黑心鴨血，簡直五花八門，無奇不有。
五十步唔好笑一百步，內地及台灣屢爆食安問題，香港其實亦唔好得去邊。最近有人以假標籤將日本核災區食品進口台灣，台灣當局公布二百多項食品需要下架，反觀本港食環署關人個關，直接放行，連檢驗都慳番，市民都唔知食咗幾多受污染食品添呀。
所以話，官僚靠得住，豬乸會上樹，旨意港府把關喎，不如自求多福好過。香港食品安全條例不合時宜，導致問題多多，有學者建議引入標示制度，為不可食用原材料標上骷髏頭標誌，方便消費者識別。冇錯嘞，既然優質產品有「Q嘜」，劣質食品有「骷髏頭嘜」都好合理啫。再講喇，修改食品安全條例費時失事，而標示制度就簡單易行，真係諗得過o架。
當然啦，食安問題之所以長爆長有，除咗因為當局把關不力，更加因為法例漏洞多多。早排坑渠油同過期肉搞到人心惶惶，當局提出規管本地食用油安全同回收廢置食用油，以及就熟肉安全監管進行公眾諮詢，表面睇係亡羊補牢，實際上係頭痛醫頭，腳痛醫腳。好簡單，唔從源頭解決問題，一味小修小補，始終唔係辦法。
有立法會議員就講得啱嘞，問題食品日新月異，適時堵塞漏洞固然唔少得，加強抽查及加重罰則至係治本之道。台灣最近建議修訂食安條例，引入重罰重賞概念，嚴懲不法商人之餘，獎勵報料民眾，增加舉報誘因。他山之石，可以攻玉，港產官僚學吓嘢喇。
一句講晒，治亂世用重典。無良奸商草菅人命，對佢哋唔使手軟嘅。正如有人話齋，只有加重刑罰，罰到傾家蕩產，甚至重判坐監，佢哋自然知驚，唔敢再製造黑心食品害人。
講開又講，問題食品食壞人，固然要加「骷髏頭嘜」標示，劣質官僚胡混度日，係咪都應該加番個「豬嘜」標籤，以資識別呢？