政情：有相為證：梁美芬橫額遭「鎅臉」
踏入選舉年，政黨掛在街上嘅宣傳橫額同直幡，被惡意破壞嘅情況更加頻密。話說立法會議員梁美芬早前喺區內掛咗多幅有關財政預算案嘅宣傳橫額，但近日就有人用鎅刀鎅走佢同助理陳國偉嘅樣貌，就連西九新動力同梁美芬個名都鎅埋，鎅得好有技巧，好似一幅藝術品。梁美芬狠批有關行為非常無品，話就算大家有唔同政見，都唔應該採取呢種方式表達意見喎。
此外，工聯會議員黃國健喺牛頭角振華道嘅直幡，尋日亦懷疑被人淋腐蝕性液體，地區幹事李嘉恒話，有義工喺朝早收回直幡時中招，要即時入院接受治療，工聯會已經就事件報警，暫時未知係咩人所為。
