被視為下屆特首人選之一嘅行政會議成員陳智思（Bernard）尋日接受電台訪問，重申自己要處理旗下集團業務，加上香港現存好多難以解決嘅問題，所以佢絕不會考慮參選特首。
對於特首梁振英（CY）話不排除競逐連任，Bernard認為CY作為現任特首，尋求連任有一定優勢，如果CY可以喺餘下任期內履行競選承諾，贏面一定會比其他參選人高。至於會否支持CY連任，佢就話要視乎對方落實到幾多政綱承諾。
雖然有政界人士分析，如果立法會否決政改方案，CY嘅連任機會就會相應提高，但Bernard認為呢個講法未必合理。佢憶述上屆特首選舉，前政務司司長唐英年本來係大熱人選，但後期民情一面倒支持CY，所以中央同選委先至改為支持CY，認為民情足以影響選委同中央嘅決定。
Bernard又話，喺北京兩會期間，幾乎所有中央官員都明確表明人大常委八三一框架無修改空間，認為除非北京權威官員肯承諾二○一七年普選唔係終極方案，令人覺得之後仍有優化空間，否則政改通過機會不大。