政情：陳記燒鵝後人加入食環諮委會
臨近四月，又係政府多個委員會換屆執位嘅時候，其中醫學專家雲集嘅食物及環境衞生諮詢委員會，尋日公布委任十一名新成員，喺芸芸專家中居然搵到深井陳記燒鵝後人陳偉明，以荃灣區議員身份加入委員會，同一眾醫生、教授齊名。該委員會過去就防控禽流感、「劣質豬油」事件等食安問題提交意見，唔知陳偉明係咪都可以就燒鵝方面發聲呢？
彭韻僖接掌公民教育委會
另外，民政事務局轄下嘅公民教育委員會主席就由選前大熱、律師會首位女副會長彭韻僖接任。據悉年約五十歲嘅彭韻僖早年曾任東區委任區議員，又做過「青少年軍」前身、青少年軍事夏令營籌委會主席，相信公民教育委員會喺佢掌舵下，公民教育政策將會殺出一條新血路。其他新委員包括百仁基金主席、理文造紙主席李文俊、兼任青年事務委員會委員嘅林長志等。
至於房屋委員會就出現政黨成員新舊輪替，包括工聯會黃國健、民建聯葉國謙、自由黨方剛及公民黨梁家傑下月「起身」，分別由佢哋嘅黨友郭偉強、張國鈞、張宇人及郭榮鏗接棒。