東方報業集團早於三年前獨家踢爆「貪曾」前特首曾蔭權爵士，任內「貪盡海陸空、歎盡省港澳」嘅連串貪腐醜行，點知案件拖到依家仲未有下文。刑事檢控專員楊家雄兩個月前已經話好快會有決定，但之後都仲係未見有採取任何行動。咁啱律政司司長袁國強尋日出席立法會財委會特別會議時，再被追問貪曾案進展，點知佢都係「人肉錄音機」上身，又係話案件已經進行「最後階段」，真係唔知「最後」到幾時。律政司一日未決定貪曾係咪「落鑊」，相信議員、市民誓不罷休。
