政情：港鐵500萬年薪撬公關「蘇」？
港鐵近年頻頻爆大鑊，小至處理小狗墜軌意外，大至虛報高鐵工程進度等，外間無不以「公關災難」去形容港鐵嘅處理手法。據知港鐵為改善形象，計劃新增公關總監一職，更開出五百萬元年薪「超高價」四出挖角，包括幾個前高官。最新消息指，曾任商務及經濟發展局（商經局）副秘書長、現任香港工業總會（工總）行政總裁嘅蘇家碧（Linda）更加係總監大熱人選。
燙手山芋 曾有人孭鑊
據了解，的確有大型企業正向Linda招手，但Linda喺工總仲有半年才約滿，最終係咪可以成功跳槽仍有變數。我哋嘗試向Linda求證，但一直未獲回覆。港鐵就話，港鐵不時因應業務發展需要，檢討同調整公司管理層架構，任何聘請總監嘅工作都係由董事局嘅遴選委員會負責，但目前冇進一步資料提供。
五百萬元年薪做總監聽落去好高價，但據知呢個位係名副其實嘅燙手山芋，好似港鐵獨立董事委員會去年就高鐵工程延誤發表調查報告，就點名批評包括港鐵公關部在內等多個部門連番失誤，更傳有人因遭報告批評而要孭鑊。
黃靜文辭任廠商會CEO
作為總監大熱，Linda來頭亦唔細，佢離開政府前官至商經局副秘書長，月薪高達十四萬元，其後自願減薪一半、跳槽至康文署任市場及業務拓展總監，一年後再轉任工總。Linda曾為時任政務司司長「貪曾」曾蔭權嘅新聞秘書，之後任保安局首席助理秘書長，喺處理南亞海嘯同埃及車禍嘅災後統籌工作亦獲各方好評。
事實上，不少前高官「跳船」後均成為公營機構、各大商會甚至私營機構的「搶手貨」，現時本港四大商會便有三名前女政務官出任總裁，除了Linda，還有運輸及房屋局前副秘書長袁莎妮出任香港總商會行政總裁，而政制及內地事務局前副局長黃靜文就出任中華廠商聯合會行政總裁，惟黃靜文日前已向廠商會請辭，未知去向。