中環出更：年年估錯數 鬍鬚曾厚顏自讚
財政司司長曾俊華（鬍鬚曾）尋日出席午餐會，繼續向社會人士推銷上月發表嘅財政預算案，一向以「守財奴」見稱嘅鬍鬚曾即使年年估錯數，但佢唔單止教在場人士點樣積穀防饑，更自吹自擂話根據佢過去八年嘅往績，雖然預算數字同實際數字嘅差額好大，但卻好可觀，所以支持佢繼續做財爺，先至可以確保政府有足夠收入應付長遠需要喎，認真大口氣！
不過，鬍鬚曾之後補番句，話知道自己做財爺令大家都唔多滿意，為免損害大家用餐雅興，都係唔再講喇。但言猶在耳，之後佢又狂數自己政績，話由○七年至今政府開支增加至少一倍，但仍然有盈餘，唔相信世上有其他地方可以做到喎！佢又話今年政府有四百五十億元投資收益，如果無咗呢份收入，每名納稅人就要多交超過八成薪俸稅，所以搞未來基金係好有道理。
稱空域問題可雙贏
鬍鬚曾最後又故作有趣，用最鍾意嘅劍擊比喻機管局計劃興建機場第三條跑道計劃（三跑），話劍擊運動員要有好體能先可以發揮到最好，就好似香港需要三跑配合發展，佢話爭議最大嘅珠三角空域擠塞問題，唔應該以零和遊戲方式看待，其實有機會搵到雙贏方法。
卓妮