中環出更：晉商春茗 帝王之後雲集
香港山西商會（下稱商會）早前舉行春茗，商會會長兼城市大學校董會主席胡曉明（Herman）喺旗下德國餐廳包場請客，傳統中國節日喺西式食肆慶祝，夠晒特別。到場嘅政商名人有霍英東集團行政總裁霍震寰、仁濟醫院前主席王忠秣及廣東社團總會前主席王國強（KK）等。唔講唔知，佢哋嘅祖先都來自山西，仲個個都係帝王之後添！
Herman自稱係舜帝後人，所以去年義不容辭創立商會。講起今年發展大計，包括招募四十位港青到山西實習，為期兩至三個月，到時霍震寰兒子兼商會副秘書長霍啟文會擔任領隊，冀藉此畀港青深刻體驗晉商文化。Herman仲宣布成立香港山西商會投資基金，由商會副會長龐寶林打理，目標係每年有一成至一成五嘅投資回報。
霍家祖先 係周文王之子
帝王之後仲有霍家，眾所周知霍家係佛山人，其實祖先係周文王嘅兒子。霍震寰話，當年佢哋嘅始祖被封於霍邑，當時流行以地為姓，遂為霍氏始源。佢笑稱，追溯起來可能個個都係帝王之後，聽聞成吉思汗後裔都有幾億人喎！講起家族爭產官司，霍震寰話，屋企人都唔想再搞落去。咁官司纏訟至今使咗幾多錢？佢話金錢事小，影響家族聲譽事大。
至於KK就自爆係春秋時代太子晉嘅後代，著名旅遊景點王家大院就係太原王氏後裔所建。王忠秣笑稱，所以商會成立時，Herman話總之搵姓王嘅加入就啱喇！
卓妮