南宋愛國詞人陸游有「北望中原淚滿巾」嘅名句，其實計功夫茶話齋，對於今時今日嘅香港人嚟講，改為「西望澳門淚滿巾」就差唔多。
唔怪得功夫茶詩興大發o架。澳門尋日發表嘅新一份施政報告，再度向市民送大禮，敬老金、殘疾津貼、學生書簿津貼、膳食津貼以至中小企稅務優惠全線上調，連埋前排財政預算案宣布連續第九年向市民派錢，仲要一派就派九千蚊，認真疏爽。人哋又施政報告，我哋又係施政報告，人哋食波板糖食到津津有味，我哋淨係得粒方糖甜吓個嘴，你話係咪恨死隔籬吖。
其實，受外圍因素影響，澳門賭業表現有所放緩，難得嘅係，雖然經濟前景有隱憂，政府惠民一樣冇手軟，派糖繼續加碼，反而港府庫房長期水浸，肥到連襪都着唔到，照計好應該還富於民，點知鬍鬚曾不改守財奴本色，一時「審慎理財」，一時「量入為出」，再唔係就用結構性赤字恐嚇市民，賴得就賴，拖得就拖。邊個真正為民，邊個孤寒成性，唔使多講喇啩。
當然啦，澳門政府敢年年派錢，除咗有阿爺照住，更重要係實力雄厚，經濟前景長遠看好。大家有眼見，澳門自回歸後社會穩定，經濟搞得有聲有色，再唔係昔日嘅梳打埠嘞。更重要嘅係，國家憲政責任冇話卸膊，國家安全早已立法，自然博得阿爺歡心。香港就啱啱相反，回歸後每況愈下，瓣瓣唔掂，經濟民生無人理，人人沉迷政治鬥爭，搞到家嘈屋閉，永無寧日，廿三條遲遲唔肯立法，國教又反對，家陣仲發展到有人驅蝗，有人反水客，甚至有人搞「港獨」，阿爺唔嬲就假。
不妨打個譬喻，一個小朋友生生性性，聽教聽話，另一個就好食懶飛，駁嘴駁舌，做父母嘅錫邊個多啲，唔使多講啦。中央對澳門無微不至，見澳門地方不足窒礙發展，送成個橫琴畀佢哋打骰，唔係冇道理o架。
所以話啫，面係人哋畀，架係自己丟。以前香港當正澳門係細佬，查實依家澳門人均GDP已達九萬美元，足足多香港成個開，幾咁巴閉。咁都唔止，香港成日自詡旅遊之都，早排聯合國轄下機構公布全球旅遊收益十大地區，澳門高踞第五位，而香港就係包尾大幡，簡直羞家。十年河東，十年河西，家陣香港掉番轉要叫澳門一聲「大佬」咁滯，真係諗起都悲哀。
始終都係嗰句，政治唔可以當飯食，香港繼續內耗內鬥，自甘墮落，遲啲莫講話比唔上澳門，變番做小漁村都似。人望高處，水向低流，唔怪得好多港人羨慕澳門人，想移民澳門喇。