政情：李焯芬：建漢學院非搞政治
香港大學專業進修學院院長李焯芬今年中會退任院長，篤信佛教嘅佢曾經講過，希望日後喺文教同慈善公益事業略盡綿力。身兼香港漢學院院長嘅李焯芬果然講得出就做得到，因為漢學院最近有新計劃，包括上月向城規會申請喺大嶼山長富街興建教育機構連宿舍。
旨在培養國學人才
城規會最新文件顯示，申辦漢學院嘅地點面積超過二千平方米，只會改動樓宇內部間隔，包括課室、宿舍、圖書館及攝影錄像製作室等設施。
李焯芬接受查詢時話，呢間學校主要係由淨空法師主辦，佢就負責學術工作，旨在培養十幾個國學人才，佢再三強調自己唔係搞政治。李焯芬如此斬釘截鐵話唔係搞政治，似乎係想避免捲入任何政治漩渦。