政情:天文台長借風災相籲居安思危

天文台台長岑智明一向有收藏開天文相片,最近佢買入一張歷史相片珍藏,該相顯示一八七四年甲戌風災時中環干諾道嘅景象。岑智明話,相中可見碼頭附近啲建築物被嚴重破壞,有報道話當時香港死亡人數有成二千至五千人;而人口得一萬五千人嘅澳門,當時則死咗五千人,換言之一場風災就令澳門少咗三分之一人口。加上全球暖化問題日趨嚴重,佢希望港人以歷史舊相為鑑,居安思危,加強警覺性。

赴英尋獲1864年手繪地圖

此外,岑智明最近仲去英國國家檔案局尋寶,原本想搵香港天文台嘅建築圖則,點知畀佢發現張一八六四年香港天文台一帶嘅手繪地圖,上面仲有時任港督羅便臣簽名。

岑智明話,現時天文台所在嘅山頭當時叫伊利近山(Elgin),喺地圖上山腳附近畫有好多大方格,反映當時好可能已有人聚居。佢又話,睇地圖發現以前嘅街名好得意,例如尖沙咀竟然有條德輔道,而彌敦道以前就叫羅便臣道。

第一手消息請下載on.cc東網iPhone/iPad/Android/Windows Phone Apps