政情：政改電視辯論 立會罵戰翻版？

葉劉「熱身論」 耐人尋味

關乎二○一七年特首普選方案能否獲得通過，關鍵係有冇四、五名泛民回心轉意支持政改，陳弘毅過去多月拋出多個方案「試水溫」，先有「白票守尾門」方案，最近再提議舉辦政改電視辯論，一見政制及內地事務局局長譚志源對電視辯論大潑冷水，陳弘毅即時有新提議，可以由建制派派人參與辯論，並指可以有多次辯論，每次邀請唔同人士參與，等市民充分了解正反雙方嘅理據。

陳弘毅嘅新提議面世後，一石激起千重浪，建制派中人對此意見不一，新民黨主席葉劉淑儀認為，如果辯論只是「口舌之爭」考辯才，相信未必可以推動通過政改方案，又表明現時無必要為特首選舉設「熱身賽」。葉太其後更留下一句耐人尋味嘅說話，「就算我要熱身，都唔使參加電視辯論！」

劉指雙方無代表性人物

全國港澳研究會副會長劉兆佳形容，依家無論係建制定係泛民都無具代表性人物，認為難以透過民調或電視辯論去改變現狀；另有資深建制派中人亦對電視辯論耍手擰頭，寧可同泛民代表閉門辯論，又話如果泛民想見中央官員，佢哋都可以幫手拉線喎。

對於電視辯論最心思思嘅，首選可能係立法會議員蔣麗芸，事關佢點名想同泛民飯盒會召集人梁家傑辯論，笑言對方身為大狀，口齒必然伶俐，就算自己輸咗都無咁樣衰。

話時話，陳弘毅原意係想港府官員同泛民就政改辯論，時移勢易改為提議建制同泛民對決，其實呢個場面分分鐘同平時扭開電視機，睇立法會直播無太大差別嘞！