中環出更：被翻舊帳 孫公想爆料又即閃
教育局前局長孫明揚（孫公）離開政府呢個熱廚房已有一段時間，尋日出席活動時突遭在場人士翻舊帳，指佢當年以房屋及規劃地政局局長身份推出「孫九招」穩定樓市，搞到當年土地供應停晒。孫公其後發言時疑似想還擊，直言依家可以將真相披露，講到似層層好似想爆料，點知最後都係欲言又止。
有團體尋日舉行午餐會，孫公、基本法委員會副主任梁愛詩等人都係座上客之一，全國工商聯房地產商會香港分會執委何顯毅（Bosco）發言時批評，當年孫公話要救市，推出咗「孫九招」，停建居屋、停售公屋、取消拍賣土地，仲殺咗擁有土地使用權嘅市政局等。
前房屋局長有「真相」披露
被人翻舊帳嘅孫公其後上台發言時，一方面叫Bosco做同學仔狀作親暱，之後笑言對方一向鍾意撩是鬥非，寸爆指「Bosco嘅記憶同我有啲出入」。孫公其後仲話，自己依家係一介草民，可以講心入面嘅嘢，並指以前做局長要對立法會議員客客氣氣，依家可以將真相披露。不過，當傳媒問到佢係咪有真相要披露時，佢未有爆料就急急腳撳升降機走人。
卓妮