中環出更：「飯堂」結業 華哥難捨叉燒王
近年商舖租金飛漲，開業逾半個世紀、被視為「明星飯堂」嘅佐敦新樂酒樓明日會光榮結業。新樂股東、香港鐘表業總會前主席梁青華（華哥）早前特意搵家人及同事去緬懷一番。華哥話，最唔捨得嘅係鎮店炭燒叉燒王，自言只需配一碗白飯已回味無窮，連山珍海味都比唔上。
自從新樂傳出結業消息後，幾乎日日爆場。身兼交通安全隊副總監嘅華哥每逢周末假日特別忙，當日下午出席活動前，特登抽空到新樂酒樓回憶過去點滴。當日華哥一行人巧遇喺佐敦長大嘅歌手吳國敬，華哥大仔兼香港鐘表業總會會董梁仲元（Raymond）及華哥秘書Angela即上前合照留念。
華哥憶述，自己幫襯新樂多年，二○○三年沙士爆發時，新樂一度落閘停業，後來重組時搵佢入股，終於渡過難關，此後新樂成為佢嘅私人飯堂，無論團年飯或請客都喺呢度設宴，如幾年前Raymond結婚都喺度擺酒宴客。
「若有合適舖位即重開」
華哥其後又細數新樂嘅地道小菜，包括芫荽皮蛋魚雲湯同多款即製點心，仲有過年必食嘅蘿蔔糕及年糕等。講到聞名嘅叉燒王點解咁好味，酒樓第二代兼董事總經理莫大任透露，秘訣係以明爐炭燒嘅木頭味道滲入肉身，同煤氣燒出嚟嘅味道自然唔同喇！
對於新樂結業在即，華哥話唔覺得傷感，事關第日如搵到適合位置，會第一時間搵番有關班底再重開。
卓妮