政情：惹火李國章坐鎮港大
大學校董會成員再有變動，政府繼日前委任行政會議成員廖長城「空降」接掌科大校董會後，尋日再委任另一行會成員李國章出任港大校務委員會成員，接替上月辭職嘅律師會前會長黃嘉純，三年任期即日生效。李國章早年出任教統局局長同中大校長時已經因為其強悍作風，而被謔稱「沙皇」、「阿瑟王」，今次離開中大「娘家」殺入港大；加上適逢港大校委會主席梁智鴻十一月退休，令人揣測「阿瑟王」加入港大係為接掌該校校委會鋪路。
我哋尋日問過李國章，佢即耍太極話唔明何謂「鋪路」，強調加入港大純粹「頂黃嘉純個位」，反叫我哋唔好聽信謠言。佢仲話，雖然過去二十幾年都情繫中大，但自嘲被人話教壞學生，依家咪唔教書囉！
睇實「反共基地」人事財政
不過，李國章過去多年同學界牙齒印甚深，今次任命例牌不獲港大學生會支持，該校學生會會長馮敬恩直斥李國章對教育界毫無建樹，李去年更公開叫罷課嘅學生索性退學，言論令人反感，揚言一定會跟進李上任後嘅工作。
事實上，港大喺佔領行動前後均被指係「反共基地」，特首梁振英喺施政報告更點名批評港大學生會刊物《學苑》鼓吹港獨，而該校上月又破天荒通過退聯公投，成為第一間退出學聯嘅大學，政府今次委任「阿瑟王」，可能就係睇中佢管理大學嘅經驗，安排佢加入港大校委會，睇實該校嘅人事任命同財政狀況都無可厚非。
自稱「N+1」屆唔選特首
港大最近風波一浪接一浪，爭議包括法律學院前院長陳文敏會否升任副校長，及佔中發起人、法律系副教授戴耀廷涉嫌收取捐款嘅調查報告等；好彩梁智鴻年底先退休，相信呢幾單棘手難題都會喺卸任前完成，但之後係點就好難講喇。此外，對於有傳李國章會選特首，佢就話自己「N+1」屆都唔選。