中環出更：氣功「施」效半年瘦17磅
福建幫商人施子清之子、香港菁英會創會主席施榮忻（Jaime），原來唔單止參與推動青年事務，近期連氣功都好埋，仲練氣功練到入廁所添！短短半年間，Jaime極速瘦身十七磅，腰圍由三十八吋減到三十四吋，身形瘦咗成個碼，肚腩消失，褲頭都顯得「鬆泡泡」，未知貪靚嘅女士們係咪都想學埋一份呢？
Jaime透露，去年因為飲得太多茶，導致心跳同眨眼不受控，周身唔自在。去年八月經朋友介紹下，認識一位福建同鄉中醫師，雙方一見如故，佢於是拜師學習內氣功，名為「內養功」，主要鍛煉五臟六腑，強健筋骨。師傅教佢由紮馬、閉氣開始，聽落好似很容易，但認真練起上嚟，唔使一陣就會頭暈眼花。
癮起匿廁所練
捱過起步期，Jaime眨眼已學懂十多式，雖然距離全套合共一百零八式嘅功法仲有大段距離，但練開有癮，幾忙都好，佢都會趁空檔匿喺廁所練功十五分鐘。而日子有功，氣色好咗，最明顯係腰間肥肉拜拜。上磅一看，體重由去年一百七十九磅，成功減到一百六十二磅，褲頭鬆到放得落幾隻手指。
雖然練氣功好處多，但欲速不達。Jaime自爆練功初期不知禁忌，曾試過秋涼時節上天台運功，忽然感覺全身「毛管戙」，打個冷震，冇耐就患上感冒，病足兩個月，全身「散晒」。事後Jaime向氣功師討教，先知道練功時最好喺室內，避免吹涼風，因為運功時全身毛細管打開，好易着涼；一旦寒氣被困體內，久久不散，佢聽後恍然大悟。
卓妮