唔經唔覺，佔領行動已結束三個幾月，警方曾承諾三個月內完成調查，將涉案者緝捕歸案，依家進展如何呢？警務處處長曾偉雄話喎，警方至今拘捕咗四十八人，涉及參與、組織非法集結，調查已完成並交律政司，正等待進一步指示，以決定係咪落案檢控。
即係咁，喺歷時七十九日嘅佔領行動中，警方任勞任怨，表現出專業精神，呢點係有目共睹；而喺佔領行動結束後，警方又全力展開調查，搜集證據，前後進行咗三波拘捕行動，幾乎將佔中搞手及幕後黑手等始作俑者一網打盡，呢啲亦係事實。可惜吖，警方盡咗自己本分，但律政司就拖拖拉拉，唔知仲要等到幾時至肯提出檢控。
有立法會議員擔心，當局執法歎慢板，處理佔中事件隨時拖幾年都無下文。有區議員更質疑，當局態度軟弱，係咪只要聚集一班人就可以為所欲為。
議員嘅擔心唔係冇理由o架，港府喺處理佔中嘅過程中，由頭到尾畀人一種軟弱怕事、有法不依嘅感覺，依家連檢控都投鼠忌器，想唔令人質疑都幾難。正所謂，禁而不止，則刑罰侮。就係因為當局有法不依，執法不嚴，嗰班牛鬼蛇神先有恃無恐，愈來愈瘋狂，搞到香港七國咁亂。呢，最近頻頻上演嘅「光復」鬧劇，話就話反水客，其實係佔領亂象嘅延續，而且比佔領更加暴力添，如果當局嚴格依法辦事，滋事分子受到法律制裁，又點敢咁猖獗吖。
正如中國社會科學院法治藍皮書指出，佔領最大副作用係對法治衝擊，若成常態，係香港嘅悲哀。而內地傳媒就認為，香港素有購物天堂美譽，出現驅趕旅客行為令人費解，若香港連旅客都不能保障，奢談法治顯得可笑。冇錯嘞，香港一向係法治社會，居然淪落到成為內地傳媒嘲笑嘅對象，講起真係幾可悲o架。試諗吓，法治係香港最寶貴嘅核心價值，亦係有別於內地之處，如果冇咗法治，香港將會變成點呢？
有人警告今年夏季將會再次爆發大規模騷亂，絕對唔係危言聳聽。佔中搞手及幕後黑手逍遙法外，養精蓄銳，隨時準備捲土重來，尤其係政改方案出爐及提上立法會表決嘅時候，可能就係爆發大規模騷亂嘅高危期。所以話，當局斬草唔除根，簡直係唔衰攞嚟衰。
都係古人講得啱，治事不若治人，治人不若治法。要避免香港再次爆發佔領之亂，要阻止滋事分子不斷搞事，辦法只有一個，就係嚴格依法辦事，速速檢控牛鬼蛇神！