政情：劉美詩捨旅遊界轉戰外傭業
旅遊界阿姐劉美詩（Susana）自一○年離開工作逾三十載嘅康泰旅行社之後，一一年即加盟專業旅運出任市場及業務發展總經理，專門推廣個人遊，搞到有聲有色。不過，原來佢已於上月靜悄悄請辭，仲要離開旅遊界，返回家人開設嘅外傭公司幫手。
話要重新學習
Susana話，屋企人開設外傭公司已經有二十年，經常都叫佢返去幫手，由於佢做咗旅遊業已有一段長時間，係時候轉換吓新環境，所以毅然決定轉行。不過，佢話一切要重新學習，但好開心作出新嘗試，仲話如果第日同聘請外傭有關嘅新聞，都歡迎傳媒打畀佢，交換吓意見喎。