政情：王晶微博「宣戰」同肥佬黎隻揪！
早前親建制人士「阿Man」突然向熱血公民創辦人黃洋達下戰書，相約喺擂台決鬥，令到政壇即時掀起一場「武鬥」熱潮。然而呢股風氣尋日仲殺入電影界，近期多次表態反佔中嘅電影導演王晶，一向痛恨泛民主派陣營人士。尋日佢就喺微博話，知道政圈有呢股「隻揪挑戰」後覺得「好玩」，更建議組隊由建制派大戰泛民，而佢就負責同壹傳媒集團前主席黎智英（肥佬黎）對打，揚言「如果肥佬黎肯打，我絕對揪佢！」
「不知想打佢幾耐」
喺娛樂圈素有「肥螳螂」稱號嘅王晶，平時喺微博經常狂轟泛民不是，但通常得把口。肥螳螂話為免人哋話佢得個講字，尋日終於忍唔住出手，公然喺微博向肥佬黎「宣戰」，決定挑戰肥佬黎，同肥佬黎上擂台隻揪，仲豪言話「不知想打佢幾耐！」
肥佬黎又漏夜離港
肥螳螂又話，既然黃洋達都夠膽接受其他人「隻揪」挑戰，自己又有意同肥佬黎決鬥，不如索性整場大混戰。到時建制派議員及政府高官組成一隊，就可以同泛民陣營決一死戰，呢場比武未打已經大有睇頭。
不過，肥佬黎早前因為在去年佔領行動中涉嫌召集、組織及參與非法集會而被警方預約拘捕，之後拒保候查，而警方近日已將有關案件交由律政司處理，研究是否採取進一步拘捕行動，所以肥佬黎到時有冇機會上台都未知呀！其實都唔好講到咁遠，肥佬黎尋晚已同老婆漏夜離港，佢喺晚上十時十五分抵達機場，問佢咁夜去邊啦，佢並無任何回應，唔通佢咁快驚定先？