政情：老嫩鴿撕裂 為三跑內訌
政府前日公布興建機場第三條跑道（三跑）融資方案，雖然外界鬧爆要使成一千四百億起多條跑道並非物有所值，但民主黨（白鴿黨）立法會議員單仲偕（騸雞）同胡志偉兩隻「老鴿」就搶先跳出嚟話該黨歡迎呢個決定，騸雞更建議政府發行「微債券」，等市民齊齊做股東。不過，事隔唔夠一日，該黨「乳鴿」南區區議員柴文瀚突然發新聞稿，話已經發起黨內聯署反對興建三跑，暗寸老鴿講嘢唔經大腦。
行政會議前日朝早開會「拍板」興建三跑後，運輸及房屋局長張炳良下午開記者會宣布有關計劃，透露機管局除咗會以暫停向政府派息、向銀行借貸及發債等方法籌錢外，亦會向每名離境旅客徵收一百八十元機場建設費，直至二０二三年三跑落成為止。騸雞同胡志偉喺記者會後即時「扑咪」交代白鴿黨立場，話雖然黨內不滿融資安排有繞過立法會之嫌，但佢哋傾向支持興建三跑嘅建議。
柴文瀚質疑有不可告人秘密
雖然呢項史上最貴嘅基建得到白鴿黨老鴿支持，但就得唔到黨內一眾乳鴿首肯同意。該黨交通事務副發言人柴文瀚尋日宣布發起黨內聯署，批評行會草率通過興建三跑建議，又話對現行計劃有保留。柴文瀚批評，行會喺未解決空域同法律問題嘅情況下倉卒通過興建三跑，令人難以信服，質疑當中有不可告人嘅祕密。
乳鴿聯署逼宮 騸雞話唔介意
聲明中亦有提及該黨對興建三跑嘅一貫立場，就係要喺解決珠三角空域擠塞、噪音、生態問題後，先至可以興建三跑。雖然份聲明只係批評政府目前嘅計劃不符該黨要求，但仔細一諗，就會發現其實佢都有不點名批評支持計劃嘅騸雞同胡志偉。
對於乳鴿利用黨內聯署「逼宮」，騸雞將呢件事歸咎於外界想以此突顯該黨內矛盾，又話自己一啲唔介意，但就拒絕再回應事件。不過，該黨立法會議員何俊仁（AV仁）係機管局委員，事前一定有喺機管局會議內討論過呢個三跑融資方案，私底下有冇同騸雞及胡志偉傾過呢件事呢？否則無理由第一時間出嚟力撐建三跑，班乳鴿係咪應該要求AV仁解釋吓呢？