中環出更：新女助理 樹根「收歸己用」
立法會議員鍾樹根早幾年先由東區區議員「升呢」晉身立法會議員，但近年已經憑其特別嘅中、英文運用技巧紅爆政壇，知名度大增，明年有望連任。我哋最近發現樹根落區時身邊多咗個靚女助理，更踩入屬於工聯會地頭嘅小西灣邨，向街坊大派生肖吉祥物。不過，樹根話會將呢位靚助理「收歸己用」，未有計劃派靚助理參加年底區議會選舉喎！
樹根向我哋介紹呢位靚女助理植潔鈴（Elaine），Elaine除咗係大學英文系畢業嘅八十後，更加係小西灣邨街坊，樹根可謂由細睇住世姪女大，早前再經街坊介紹出任樹根助理。樹根所屬嘅民建聯，陸續有地區元老級交棒畀地第二、三梯隊，咁樹根係咪想Elaine接棒先？點知樹根話Elaine仲好後生，未有計劃參選，莫非要等下屆先有位先可以出選？
老婆突帶湯水「辣更」
就喺呢個時候，鍾太突然帶同紅菜頭湯現身，笑笑口咁叫樹根飲湯，樹根亦好受落，笑住咕咕聲係咁飲。鍾太隨時隨地帶埋湯嚟「辣」更，相信所有助理已經比鍾太過目兼首肯喇！
卓妮