中環出更：反水客示威 衝擊珠寶業
近期有激進反水貨客示威者翻轉全港，令珠寶金行等零售業飽受衝擊。香港鑽石總會（總會）早前舉行周年晚宴暨慶賀「天然鑽石品質保證」標誌啓動典禮，唔少人提起呢個熱門話題。周大福珠寶集團非執行董事古堂發話，今年業界最大挑戰係要面對呢種唔理智嘅民眾情緒，盼反水貨客市民情緒平靜下來，及租金回落，咁大家先至有飯食。
批發及零售界立法會議員方剛都有到場，佢話政府急需做啲嘢，令反水貨客嘅年輕人消消氣。
一簽多行問題 方剛盼勿拖
一簽多行帶來嘅問題眾所周知，政府應果斷出手，唔好再採「拖字訣」。總會主席馬墉宜就話，來年經濟起伏難測，業界面對嘅壓力唔少，故總會將加強消費者在香港購買鑽飾嘅信心，以帶動業務增長。
「天然保證」 圖保港誠信招牌
晚宴上，總會副主席兼粵港澳湛周生生董事總理周傑成、總會秘書長兼胡良利集團主席胡劍江（Michael）及晚宴籌委會主席姚蔚然滿場飛招呼賓客。周傑成話，現時已有三百三十多家店舖參與天然鑽石品質保證計劃，由於坊間人造鑽石當道，故冀藉此認證供消費者識別。Michael就話，今次係業界自發嘅自我監察行動，以力保香港嘅誠信招牌立於不敗之地。
香港貿發局副總裁周啟良都有捧場，佢形容鑽石業係開心嘅行業，事關買珠寶鑽飾總係同至愛分享最開心嘅時刻，而佢都唔例外，第一次買鑽石係送畀心愛嘅媽咪。
卓妮