港鐵年年賺大錢 何不減價息民怨

古人教落,欲發財先立品,品正則商達。意思好簡單,有良好嘅品格,生意先至會興旺發達,而生意興旺發達就要識得回饋社會。可惜吖,港鐵年年賺大錢,但始終唔明白發財立品呢個道理。

嗱,港鐵啱啱公布嘅業績顯示,舊年盈利達一百五十六億元,較前年大增近兩成,反而透過即日第二程九折優惠方式回饋乘客嘅金額只有區區兩億幾元,完全不成比例。港鐵全年總乘客量上升百分之四點五,創下十九億幾人次嘅新紀錄,當中本地乘客增至十五億幾人次,較前年增加百分之五。舊年佔中影響各行各業,唯獨港鐵唔止冇受影響,反而受惠添。仲有吖,根據可加可減機制,港鐵今年可再加價逾百分之四,簡直係錦上添花,富者愈富。唔怪得有人話,港鐵可能係全世界賺錢最多嘅公共交通機構,真係冇誇張o架。

即係咁,可加可減機制係當局制訂嘅,港鐵按本子辦事,本來無可厚非,問題係港鐵年年賺大錢,年年照加價,咁又點樣令市民信服呢?冇錯,上市公司需要照顧股東利益,但唔好唔記得,港鐵係全港最大公共交通機構,而且港府係大股東,無論如何都唔能夠唯利是圖,罔顧市民及社會利益喇。

提到可加可減機制,真係唔講猶自可,一講把幾火。當年制訂呢個機制,係為咗防止公共交通機構隨便加價,影響民生,點知當局掛一漏萬,淨係考慮運輸業工資指數及通脹等因素,冇考慮港鐵嘅盈利,結果可加可減機制反而成為港鐵賺大錢照加價嘅擋箭牌。唔計今年,港鐵已連續五年加價,而五年都係賺大錢,搞到交通費愈來愈昂貴,基層市民百上加斤。可加可減變成有加冇減,你話港府係咪弄巧反拙,添煩添亂吖?

其實,法律不外乎人情,可加可減機制都可以靈活變通嘅啫。有立法會議員認為,港鐵盈利增幅驚人,理應凍結票價,並以各種方法回饋乘客。其實計功夫茶話齋,以港鐵嘅盈利水平,唔止要凍結票價,直情應該減價,咁先至係正路吖嘛。

最離譜嘅係,港鐵加價從來唔執輸,但對工程延誤及超支卸得就卸。呢,淨係廣深港高鐵香港段咋,估計最少超支六十五億元,根據港府與港鐵嘅委託協議,納稅人需要承擔其中嘅二十億元,簡直係冤哉枉也。

講到底,港鐵之所以能夠予取予求,皆因港府失職,身為大股東冇好好監管港鐵不特止,仲掉番轉頭為加價護航。如果話港鐵飛擒大咬,咁港府好明顯就係幫兇!