習慣做鍵盤戰士、逢星期日靠「局長隨筆」同市民「交流」嘅民政事務局局長曾德成，尋日罕有現真身出席傳媒茶敍，而且任問唔嬲。不過，任問唔等於必答，德成局長對於轄下即將換屆嘅青年事務委員會、公民教育委員會，以至其政治助理最新招聘情況等人事編制問題通通封口，但就話盛傳接掌公民教育委員會嘅民政局前常秘楊立門「好似仲想唱歌」，直接幫楊閂埋後門。
青年問題以至政改爭議近期鬧得熱哄哄，民政局都有份主理呢兩方面事務，但適逢《基本法》下月頒布二十五周年，政府除咗喺學校搞填色比賽，仲有冇新橋幫助青年認識《基本法》呀？德成局長話填色比賽都係一種推廣方式，透露十八區區議會都會舉辦相關展覽，加強宣傳，又話睇到今時今日港人對《基本法》了解真係不足喎。《基本法》頒布咁多年都仲停留喺舉辦展覽，唔怪得港人認識咁貧乏啦！