攔途截辯?民記下次趁早

立法會大會暫停兩星期遷就北京兩會,今日將會恢復會議。近期熱議反水貨客行動,個個議員都想做到「急市民所急」,本來自由黨批發及零售界方剛成功喺下周大會上動議辯論反水貨客行動,但估唔到民建聯(民記)想搶飲頭啖湯,仲要由鍾樹根、蔣麗芸(Ann)同葛珮帆(EQ)分幾路大包圍進攻。可惜三路攻勢只得阿Ann可以喺今日大會上提出書面質詢,EQ同樹根都截胡失敗。

北上開會 失「抽水」先機

反水貨客活動喺過去多個周日搞到滿城風雨、天怒人怨,無論當局、居民或店舖東主都非常不滿。不過,由於唔少建制派都北上開會,所以失咗「抽水」嘅先機,令方剛有機會排頭位飲頭啖湯,定於下周三大會上提出動議辯論規管水貨客,到時一定成為辯論焦點。雖然阿Ann都成功喺今日會議提出質詢,但只係書面質詢,唔係口頭質詢,議員唔使發言,官員亦唔使即場回應,曝光自然少好多。

可能民記都知道單靠阿Ann呢個書面質詢唔夠力,所以上周已經出動樹根,諗住叫佢喺今日會議上提出緊急口頭質詢,等民記可以搶先提出問題兼向泛民主派發炮,令市民覺得民記好緊張呢件事,擺明搶飲頭啖湯兼截胡。可惜樹根呢一招不獲立法會主席曾鈺成批准,據聞樹根都唔敢硬闖,識趣地主動「收回」緊急質詢要求。

身為樹根黨友嘅EQ眼見緊急質詢呢招唔奏效,諗住轉一轉個角度要求喺今日會議上提出休會待續議案,內容當然都係講反水貨客活動對香港法治、經濟、民生有咩影響,政府應該有咩對策等。不過,曾鈺成尋日作出書面裁決,話EQ提出休會待續議案嘅理據無迫切性,就算遲啲提出動議,辯論都唔會失去意義。仲話方剛喺下周三大會都會提出類似嘅動議,建議EQ可以到時表達意見喎。睇嚟民記要先知先覺啲至得喇!

第一手消息請下載on.cc東網iPhone/iPad/Android/Windows Phone Apps