中環出更：村代表津貼 侯志強叫價三萬
政府早前向立法會提交文件，建議大幅提高區議員薪酬同實報實銷開支上限，但同樣受選舉法例規管及選舉產生嘅村代表，每年只係得八千元津貼，唔少鄉紳都大呻唔公平！上水鄉事委員會主席侯志強尋日就喺鄉議局執委會會議提出特別提案，建議將津貼由每年八千元提高到三萬元，點知鄉議局主席劉皇發笑佢開價太低，侯志強就即刻改口話：「咁開五萬，等政府還（價）三萬啦！」
現時每年八千元
其實又難怪村代表要出來爭取加薪，自從一○年有咗村代表津貼開始，津貼額就一直無加過，一季二千元嘅津貼，除開平均每日僅得二十二元，真係食個下午茶就無咗。有唔少村代表都曾經大呻，日日全天候服務村民，但係就連最低工資都拎唔到。所以侯志強建議加津貼，現場好多人拍手表示支持，佢哋將會向政府提出有關建議。話時話，今次侯志強突然出招，莫非佢真係想爭鄉議局副主席之位？
卓妮