中環出更：黃伊汶做會董 鐘錶業添活力
鐘錶業係香港嘅工業支柱，唔憂冇人入行接棒做新生軍。匯聚業界菁英嘅香港鐘表業總會（總會）早前舉行新一屆會董就職禮，由原任總會副主席嘅張繼東（Anthony）接替高鼎國出任新主席。Anthony特意搵從商嘅前歌手黃伊汶加入做會董，靚女亮相，為總會增添幾許青春活力。
今屆副主席全女班
黃伊汶話，佢三年前同一間法國品牌合作，一腳踏入鐘錶界，入行後做得好開心。今年公司嘅亞洲發展重心係在香港廣開分店，同時將品牌擴大至鞋履等商品，希望加入總會同業界多啲交流。講到叻女，仲有今屆全女班副主席，包括冧莊嘅黃麗嫦及徐珊雯，仲有升呢做副主席嘅九龍表行第三代後人黃雅芝。
當晚到賀政商名人眾多，而總會永遠名譽會長孫秉樞形容去年係業界崎嶇嘅一年，今年又面對多國外匯波動衝擊，故此呼籲業界來年要做最壞嘅打算，保持審慎樂觀。卸任主席嘅高鼎國就一派輕鬆，佢話日後除咗打理家族鐘錶生意之外，仲會投放多啲時間做青年工作，最近佢就以香港青年工業家協會執委身份到大專院校開講座，希望為年輕人帶來正能量。
劉燊濤盼「一年抱三」
上月升呢做爸爸嘅香港工業總會主席劉展灝兒子劉燊濤都在場，佢笑稱仲學緊湊仔，包括換尿片、餵奶及掃風，試過一日只瞓兩小時。雖然咁辛苦，但係佢冇有怕，新年願望係「一年抱三」，即係年尾再生多對孖胎，咁就可以收工喎！
卓妮