承辦商冇手尾 亂放鐵欄
房屋署被指胡亂擺放鐵欄，製造陷阱。石硤尾白田邨第十座與十一座之間設有一個公園，居民黃婆婆發現，公園旁近日擺放多個鐵欄，部分更佔據出入口位置，阻礙途人，擔心會有長者因此絆倒受傷，「啲欄杆擺晒喺公園又冇人理，係咪真係要戟親人先會執走？」
恐絆倒途經民眾
房屋署發言人表示，第十座與十一座之間公園早前有一組遊戲設施損壞，遂以鐵欄圍封，並有張貼告示列明待修，以免使用者受傷。發言人指有關維修工程現已完成，遊戲設施重開後，承辦商已將鐵欄移走。「啲設施整好晒，個承辦商唔係應該連埋啲欄杆一齊搬走嘅咩？」黃婆婆批評有關承辦商「冇手尾」，對途人安全構成威脅。