唔少人接到財仔推銷電話，相信都有衝動回佢一句︰「唔收息多多都借。」呢，前日觀音開庫濟民，唔會利疊利之餘，仲永無托手（月爭），想借幾多都得，唔怪得吸引大批善眾逼爆全港觀音廟啦。
好似香火最盛嘅紅磡觀音廟咁吖，夜晚十一點開門，七點已經有過千善眾聚集，有人提早一日排隊，有人先「借」為快，亦有人趕住還「錢」，結果附近一帶要封路，都咪話唔誇張。
觀音開庫人人有份，排頭位嘅後生仔成功借出三千萬，有人更「中頭獎」借足十億，笑到見牙唔見眼。不過咁，如果市民衣食無憂，掂過碌蔗，又使乜三更半夜舟車勞頓求神拜佛借庫還債吖。嗱，幫襯觀音借錢嘅人愈多，即係等錢使嘅人愈多，港人愈來愈唔掂囉。
鬼咩，家陣百物騰貴，樓價租金失控，生活成本係咁升，市民生活質素係咁降，日子愈來愈難捱。呢，香港樓價就升到冇朋友，而早排有全球城市生活質素調查顯示，香港僅排第七十位，醜死怪。另一項調查更顯示香港嘅「痛苦指數」遠高於內地同台灣，兩岸三地中香港人最唔快樂添。
冇符喇，搵食艱難，市民苦過弟弟，港府雖然肥到連襪都着唔落，但一味做守財奴，叫佢派糖仲慘過食佢隻車。呢，財政司司長曾俊華前排公布嘅財政預算案雖然係咁意叫做有「加糖」，但又唔湯唔水，求其畀市民甜吓嘴唇就算，長遠承擔更幾乎一啲都冇。等港府發慈悲轉死性咯喎，蚊都瞓，蛇都死喇，善男信女咪惟有自求多福，向觀音借庫祈求超自然力量打救囉。
講開又講，燒香許願拜神靈，除咗求財就係求平安。又難怪嘅，家陣香港立立亂，政治爭拗無日無之，社會矛盾不斷升級，弊在政府超無能，扶貧助弱雷大雨小唔在講，連為港人提供一個安全、穩定嘅社會環境，同樣無所作為。嗱，佔領行動長近三個月，搞到香港雞毛鴨血，佔領落幕又過咗三個月嘞，但搞手同黑手至今仍逍遙法外，問你點頂。其實另類佔領之所以層出不窮，港獨思潮之所以甚囂塵上，示威行動之所以變本加厲，甚至連市民周日到禮賓府賞花都被滋擾，原因一字咁淺，咪就係港府有法不依，變相鼓勵非法行動囉。
港府有權柄喺手唔保市民平安，庫房水浸又唔幫市民解困，港人叫天不應，叫地不靈，叫官不聞，好在我佛慈悲，觀音菩薩有求必應，小市民多多少少有啲心靈慰藉。唔該大慈大悲嘅觀音菩薩再顯神通，將啲搞事分子、牛鬼蛇神、庸官劣吏一嘢收走，咁香港就一天都光晒嘞。