公民講場：盲毛亂「釋法」獻醜

語不驚人誓不休、外號「正盲毛」嘅公民黨立法會議員毛孟靜，尋日又喺立法會政制事務委員會發表偉論，指《基本法》第十八條明明規定全國性法律不適用於香港地區，但人大常委會又透過「八三一」決定香港政改設下框架，質疑中央咁做係違反《基本法》，要求政制及內地事務局與律政司代表解釋回應喎。有關言論引起多名建制派議員嘩然，其中本身係法律學者嘅梁美芬，就即時寸爆正盲毛對「一國兩制」同《基本法》一知半解，首先「八三一」決定並非全國性法律，但根據《基本法》同人大釋法對香港係有法律約束力嘅。如果正盲毛嘅理論成立，咁之前嘅二○一二年政改方案同二○一七年落實特首普選嘅承諾都係無效喇？泛民仲有乜權話中央違背承諾呢？