泛民太霸「道」阻政府轉線
行政立法機關角力持續，政府因應泛民於立法會財務委員會對開設創新及科技局撥款「拉布」，決定撤回早前四項撥款議程，改為納入新一年財政預算案一併審議，財委會尋日朝早就召開特別會議討論此事，一批泛民趁機質疑政府破壞三十年來嘅憲制慣例，旨在繞過或避開立法會監察，建制派議員群起反駁泛民歪理，指他們「賊喊捉賊」，其中工聯會議員黃國健更批評泛民太霸道，拉布阻礙條行車線，暗指政府作為駕駛者要諗辦法轉線，無理由咁都被人鬧。
非經常開支納預算案
泛民早前發起不合作運動於立法會多個委員會拉布，泛民多個黨派代表如工黨李卓人、社民連梁國雄、人民力量陳志全等人統統有份，撞正尋日立會討論部分直接納入預算案一併審議嘅項目，李卓人指出，自己於預算案發表後見到另外廿一項撥款申請，政府決定納入預算案，唔經財委會會議，佢批評政府自一九八五年後，都未試過將非經常開支納入預算案審議，質疑政府依家突然諗出一個辦法繞過立法會。
建制派聽到泛民惡人先告狀，隨即群起反撲，其中黃國健火力最猛，狠批泛民拉布已成常態，形容拉布阻礙條路同行車線，駕駛者當然要諗辦法轉線，唔通塞住喺度唔郁同等咩？佢又諷刺泛民喺立會「唔拉布就唔舒服」，自言拉布同泛民已有等號，依家「塞車唔畀轉線都要鬧」，認為係有人太霸道︰「你破壞在先，人家採取應對方式你都唔畀，仲大興問罪之師，我覺得太霸道」。
陳家強：無意繞過立會
工聯會另一議員陳婉嫻（嫻姐）承認政府做法少見，形容此舉係「非常手法」，好似迪士尼樂園工程、電影發展基金都要討論，唔係一放手畀政府，冇得監察係唔得。嫻姐又話，自己做咗廿年議員，唔同意政府呢個做法，不過都知政府形勢困難。
財經事務及庫務局局長陳家強回應指，政府檢視後認為部分非經常開支，好似更新設備，爭議唔大，唔涉及新政策，認為應該同經常開支做法睇齊，無意繞過立法會。佢承認，今次係三十年來首次將非經常開支納入預算案，係為咗精簡程序，應對立法會財委會緊迫嘅審議時間表，至於首長級公務員開位，以及工務工程都會繼續由財委會審議。究竟係邊個惡人先告狀，邊個破壞憲制傳統迫令政府變招出擊，答案相信不言而喻。