中環出更：楊Sing開個唱 政商齊撐場
民政事務局前常秘楊立門（Raymond）素有「AO （政務官）歌王」美譽，當年與梅艷芳於新秀歌唱比賽中雙雙進入決賽嘅佢，自退休後終有機會追逐夢想。尋晚佢以「健康快車光明大使」身份，喺香港大會堂演奏廳舉行首個個人慈善演唱會，吸引大批前AO同事及政商界名人魚貫捧場。一嘗開個唱滋味嘅佢，全晚施展渾身解數，唱勻中、英、以至日文歌曲，台風十足。期間佢仲落台遞咪畀其中一位「粉絲」商務及經濟發展局前局長馬時亨一齊唱，氣氛高漲。
個唱梗唔少得話當年嘅環節，楊立門大爆當年新秀大賽時，因不滿被迫要着古裝，搞到成個「秋官」咁出場而中途退出。佢又話，至今冇後悔過加入政府，起碼任內冇被人叫落台或辭職。但佢有時都不禁會諗，若果佢有留喺樂壇發展，啲金曲就唔會畀咗其他「天王級」歌星唱喎。佢仲透露，本來做好最壞打算，萬一個唱冇人嚟，就孭起晒所有演唱會門票，笑言預咗唔見一大截退休金。
籌140萬捐助健康快車
結果演奏廳全場一千四百個座位座無虛席，Raymond嘅「上上手」民政局前常秘「媽打」李麗娟同下手現任常秘馮程淑儀都有嚟捧場，其中後者更全程揮動吹氣棒，近似瘋狂地熱烈歡呼同打氣。Raymond又罕有公開獻唱「你的名字我的姓氏」，冧爆喺現場嘅太太。連佢個仔楊上知（George）都自愧不如，話爸爸平日在家甚少唱歌，呢晚嘅表現真係要畀足一百零一分。
今次演唱會籌備咗近九個月，約籌得一百四十萬港元。嚟到捧場嘅仲有食物及衞生局局長高永文、教育局前局長「孫公」孫明揚夫婦、新聞處處長聶德權、九巴後人雷兆光與太太雷林靜怡、「玩具大王」蔡志明太太蔡李惠莉、媽打細妹李桂蘭等等。健康快車創會主席方黃吉雯指，早前帶楊立門到湖北省火車醫院了解他們為白內障病人進行的手術及服務等，認為Raymond形象正面，盛讚佢為社會服務的善心。
卓妮