最近水貨問題搞到香港七國咁亂，嚴重影響市民生活，其實相對於病毒暗度陳倉，隨時殺入香港，水貨可能仲係小兒科咋。
唔係亂噏o架。內地實行一孩政策，唔少父母希望一索得男，想盡快知道生仔定生女，可惜當局禁止以血液鑑定胎兒性別，有中介公司睇準呢個商機，推出孕婦內地抽血、香港驗血服務，標榜懷孕七星期就可以驗，加上本港化驗水準可靠，吸引唔少人幫襯。淨係本月二日咋，內地海關就檢獲一千六百支血液製品，日前又喺一名香港水客行李裏面發現一百四十多支血液樣本，原來佢之前已經有十九次攜帶違禁品被內地海關退運嘅紀錄，可想而知偷運血液嘅情況有幾咁嚴重。
咪以為偷運血液係小事吖，正如學者話齋，血液可以傳播愛滋病、沙士、伊波拉病毒以及肝炎等傳染病，屬於高風險物品，運送過程有嚴格規管，除咗要向衞生部門申請，血液樣本必須有雙重包裝，試管要逐支放入特製嘅強化塑膠罐內，連試管之間嘅吸水物料都有講究。家陣中介公司求其請個水貨客，將血液樣本帶過關，都咪話唔牙煙。
話時話，點解運血水客次次都喺內地海關斷正？唔通香港呢邊不設防？有立法會議員就講得啱嘞，本港海關把關不力，加上衞生署對化驗所監管及巡查不足，搞到中門大開，內地血液源源偷運來港，真係多得佢哋唔少。以前成日話國產官僚做嘢敷衍塞責，懶懶散散，港產官僚只係五十步笑百步咋。
其實，內地孕婦香港驗血已經唔係新聞，幾年前內地傳媒已經報道過，價目、流程甚至邊啲化驗所提供驗血服務，全部一目了然。點知港府闊佬懶理，從來冇執法，淨係識得耍官腔，聲稱將血液運入本港，要向衞生署申請喎。執法部門唔嗲唔吊，為走私客大開方便之門，唔出事至奇喇。
冇計喇，港府把關甩漏多多，烏龍百出，市民早就見怪不怪。衞生署監管藥物安全同醫學美容不力，以致接連搞出人命。而海關亦唔好得去邊，有人做過測試，拎住兩個裝有香煙嘅煙盒過海關，居然照樣放行。所以話，旨意港產官僚為港人把關喎，真係蚊都瞓蛇都死。
嗱，咪話功夫茶唔提醒，香港時運低，本來已經得番半條命，萬一內地血液傳播疫症，咁就嗚呼哀哉，隨時死得嘅喇！