模影模蹤:挑戰底線趙紋清

雲南地靈人傑,而且專出美女,所以今日專登搵咗個嚟自雲南嘅模特兒介紹畀大家認識,佢嘅名字叫趙紋清,家陣喺北京發展,成績不俗,至於佢嘅成功上位之道原來係不恥下問!

請教前輩

雲南嘅女孩子大多比較秀氣,趙紋清亦唔例外,單睇相頭,秀外慧中,氣質過人,甫出道就被龍友睇中,不時搵佢拍少女寫真,阿妹愈嚟愈受歡迎,更有廠商搵佢拍少女便服時裝照,後嚟趙紋清成為了婚紗專業戶,拍攝唔少婚紗硬照,事業可以話一帆風順,及後佢離開家鄉到北京發展。由於北京一街都係新人,要脫穎而出除咗要有真本事外,仲要懂得變通,趙紋清一有機會,就會請教同業前輩,明白到單靠清純氣質好難喺圈中發展,於是改行性感路線,同時得知網友最關注車模和動漫女郎,趙紋清就嘗試喺呢兩方面發展,加上阿妹嘅身材不俗,對佢嚟講絕對冇難度!

性感火辣

初走性感路線嘅趙紋清,一啲都冇怯場,而且表現出色,性感度極高,所以深受廠商和攝影師歡迎,性感火辣寫真推出後更一嗚驚人,網友深深被佢吸引,粉絲人數轉眼上升至幾萬人。之後趙紋清參與網絡遊戲嘅人物扮演,以性感古裝扮相示人,令人對佢刮目相看。闖出名堂後,趙紋清都有接時裝同婚紗拍攝工作,但發展似乎出現樽頸位,有點停滯不前,於是趙紋清問前輩意見,點樣可以超越自己,最後得知就係向性感底線挑戰,接拍一些超性感嘅寫真,趙紋清明白既然係唯一方法,於是拍拍心口就喺上年拍咗輯超性感寫真,照片性感度爆晒燈,立即引起網友哄動,更因此突破12萬嘅粉絲人數,成功上位!

專屬網站

簡介:喺趙紋清嘅官方博客裏面,收錄咗佢好多照片,包括時裝照、便服照、婚紗照等,當然唔少得性感照啦!有好多仲係絕密首度公開o架!

網址 http://blog.sina.com.cn/lucywenqing

趙紋清Profile

出生地:雲南紅河

三 圍:33-23-33

身 高:165cm

撰文:龍四海