政府啱啱成立「降低食物中鹽和糖委員會」，呢個畫公仔畫出腸嘅委員會名稱成為網民熱話，有人笑稱油都冇益，唔通遲啲要成立一個「少油委員會」咩？雖然嘲笑嘅人多，不過至少已收到唔錯嘅宣傳效果。尋日委員會主席陳智思出席電台節目時就話，若果宣傳效果不佳，長遠要考慮立法規管連鎖食肆列明菜式嘅糖和鹽含量喎！吓？咁政府又點確保食肆嘅聲明係真確先？唔通又要成立一支隊伍，隨時帶個測鹽或測糖器殺入食肆廚房突擊巡查？
