區議會選舉將於年底舉行，各政黨積極備戰外，十八區民政事務處亦增聘人手以應付未來激增嘅選舉工作。好似荃灣民政事務處就以時薪六十一元七角招聘選民登記幹事，受聘者需要喺今年五月十四日至七月二日期間，監督選民登記助理更新選民資料，以及協助市民辦理選民登記事宜，若成功收集到一份選民登記表格，仲可以有額外三元六角津貼，上限九百九十二元。
計落一個月返二十日工，每日九個鐘，一個月薪金連津貼可以高達一萬二千元，都可算係一份筍工，加上入職要求唔高，中學文憑試五科成績達三級以上即可符合基本入職要求。
此外，大埔民政處亦以時薪四十八元招聘選民登記助理，同樣成功收集到一份選民登記表格額外有三元六角津貼，相信呢份短期工會有唔少年輕人競爭。民政事務總署發言人話，暫時未統計總招聘人數。莫非政府想用銀彈攻勢，谷高選民登記數目交數？