政情：方文雄：水客問題令歐洲羨慕
反水貨客示威浪潮持續，無論建制、泛民陣營都建議政府要檢討個人遊政策，不過商界就唔係咁諗。中華總商會副會長方文雄（David）尋日出席一個活動時話，好多歐洲國家嘅零售業水盡鵝飛，香港即使多水貨客，逼到街頭及部分店舖水洩不通，但都係一個令人好羨慕嘅問題喎！
辱罵內地人 無助紓困
David解釋話，歐洲好多國家經濟不景，失業率達到雙位數，人人都好珍惜旅客到訪，因為市民冇就業，就冇辦法改善生活，影響整個經濟活動。David呢個諗法夠晒阿Q，唔知當訪歐旅客多到爆煲時，啲歐洲人會唔會為咗經濟而唔要安寧生活呢？
David又話，部分年輕人隨街辱罵內地人洩憤，咁樣發脾氣都冇用，「又唔會多條街畀水貨客走水貨」，建議年輕人將水貨客對佢哋日常生活嘅影響化為科學化數據，然後向政府表達，唔應該只係一味感性地製造問題咁話。