政情：新丁出選有房津！
區議會選舉鐵定十一月二十二日舉行，各政黨早已有如意算盤部署選戰計劃，其中新民黨作為近年冒起得最快嘅建制政黨，加上主席葉劉淑儀銳意「更上一層樓」，一定同新結盟嘅公民力量積極擴展地區版圖，重點培育新界東、新界西及港島新丁進身區議會。據了解，葉劉作為保安局前局長，除咗將政務官文化帶入新民黨，仲使出銀彈政策，為新丁落區插旗提供房屋津貼，借近水樓台增加勝算。
近水樓台先得票
新民黨標榜黨員位位專業、高學歷，但就唔似得部分建制陣營背後有龐大資金支持。有口痕友透露，黨內領導自知要求新丁落區一擊即中有難度，「蛇齋餅糉」亦唔係佢哋風格，因此欲借「近水樓台」呢招幫新丁入屋。據知唔少新丁獲黨資助搬到區議會選區所在嘅屋苑，希望總有一個黨友喺左近。由於該黨主打中產區，所以即使只係半額房津，都要幾千蚊起錶，但當選後仲有冇房津就係後話喇。
雖然該黨表面上唔多見接受大額捐款，又或有善長以幾千萬元競投字畫，但其實幾位領導本身都係「大水喉」，好似葉劉唔係年初突然「中伏」、被黑客入侵電郵戶口騙取佢瑞士銀行戶口幾萬元美金，都唔知佢家底富貴到要去瑞士私人銀行開戶口啦！至於黨副主席田北辰執掌咁多間連鎖時裝店，財力就更加唔使講嘞！
引入政務官文化
除咗房津，葉劉創黨前任職政府多年，唔多唔少都將政務官文化帶入黨。有黨友透露，該黨內部架構嚴謹，事無大小都要黨員白紙黑字寫報告兼存檔。其中一個經典例子，就係社區主任想幫街坊搞活動，都要填表格交代活動目的、預期效果等，填錯資料仲要彈番轉頭再填過。睇嚟喺該黨工作同喺政府總部冇乜分別，相信當年退黨、加入政府體現旋轉門嘅黨友都好快適應官場文化。