中環出更：籌備百周年慶典 女童軍同氣連枝
香港女童軍總會（總會）今年換高層，候任香港總監李周美枝（Pearl）五月初履新。人腳變陣，但大計不變，首個大騷係迎接明年女童軍成立一百周年大日子。Pearl話，已密鑼緊鼓籌備「千人大露營」，到時將有來自世界各地逾千名女童軍參與。
早前總會舉行新春團拜，Pearl一身唐裝現身，眾人見到佢就恭喜一番，倍添喜氣。
雖然未正式上任，但Pearl話近排已經忙不停，事關總會新項目多，既要籌劃新總部，又要搞青年旅舍，每項大計都牽涉政府多個部門，開會都有排開。難怪Pearl呻話，連做運動都無時間，幸好姊妹們上下一心，齊齊出錢出力搞好會務。
陳曦齡藥業攻印尼
周身唔得閒嘅仲有做藥品生意嘅總會副會長陳曦齡，佢話香港有西藥及科研人才基礎，製造出來嘅藥品有晒信心。所以佢將擴大海外市場，而新建嘅大埔廠房已落成，現正進行裝修，嚟緊更會進軍印尼喎！
男成員團拜勁搶眼
當日到場嘅仲有香港管弦樂團董事局副主席蔡關穎琴（Janice）、總會副會長梁王培芳、名譽副會長方劉小梅及鄧鳳賢等人。總會係女人天下，男士只係「少數民族」，當日名譽副會長王嘉恩與陳明耀都有出席，特別搶眼。Janice話，早前隨團去歐洲表演兩星期，佢坐喺台下聽足六場音樂會，盛讚維也納同蘇黎世嘅音樂廳冇得頂，因為樓底高，交響樂迴蕩空中，恍如天籟之音，聽到唔捨得走。
卓妮