唔知係咪受港府起樓「寸土必爭」，「見縫插針」啟發，唔少車主有碇就泊，甚至連彎位都唔放過，搞到街道淪為公眾停車場，塞住條路不特止，最大鑊係其他司機視線受阻，分分鐘釀成嚴重車禍添呀。奇就奇在，執法部門居然隻眼開隻眼閉，你話唔係變相鼓勵都冇人信喇。
呢，好似大埔工業邨嘅大順街同大富街等路段，就係違泊重災區嘞。特別係大順街，嗰度原本係雙線雙程行車，但幾乎成條街都泊滿大貨車，每日下晝繁忙時間情況更加惡劣，連轉彎位都泊埋。有司機反映，每次駛經都膽戰心驚，擔心萬一有對頭車，會閃避不及。
附近嘅大富街一樣咁牙煙，來回方向慢線泊滿車輛，其他車上落貨嗰陣就要佔用部分快線，嚴重阻礙行車，遇到有大型貨櫃車經過，甚至會佔埋部分相反方向行車線，有貨櫃車司機焗住開着車頭大燈，提醒對頭車司機注意，簡直險象環生！
講真，違泊問題已經困擾該區多時，有市民勸過班司機大佬，可惜無功而還。又難怪嘅，連執法部門都唔出聲，普通人「多管閒事」，佢哋睬你都傻啦。咁運輸署又點睇呢個問題呢？運輸署發言人話喎，佢哋同意違泊構成危險，會考慮喺有關彎角增設全日或者部分時間禁區限制，並就建議進行諮詢。
咁就奇嘞，既然知道有危險，唔該拿拿臨做嘢，仲有咩好「考慮」呢，咪畀人睇死，所謂「考慮」、「諮詢」其實只係官腔，拖下拖下又係不了了之嘅咋，如果唔係，就唔會有「信佢一成，雙眼失明」呢個講法喇。退一步講，就算真係設立禁區，有關部門如果唔加強巡查，嚴格執法，都係形同虛設嘅咋。呢嗱，警方舊年在該區淨係向違泊車輛發出五十張牛肉乾，唔怪得司機大佬當禁區冇到喇。
違例泊車氾濫成災，除咗港產官僚疏於執法，當局規劃冇與時俱進，同樣難辭其咎。正如有地區人士話齋，該區泊車位之所以咁緊張，係因為好多可以泊到幾百部車嘅地方，近年都回收做其他用途。真係諗極都唔明，工業邨有幾多廠房，需要幾多車位，條數照計唔難預，如果當局一早未雨綢繆，做好規劃，又點會搞成今日咁吖？
嗱，大埔工業邨違泊問題只係交通亂象嘅冰山一角咋，除咗車輛阻街，電單車違泊冇人管，咪錶被阻冇人理，市民投訴不絕於耳，有關部門依然關人個關話之你。始終都係嗰句，港產官僚連違泊咁小嘅事都搞唔掂，旨意佢哋解決政治經濟等深層次問題，蚊都瞓蛇都死喇！