政情：泛民突聯署 疑箍票捉鬼

立法會將於今年中就政改方案表決，泛民陣營尋日突然召開記者會發表政改聯署聲明，堅決反對「八三一」框架下嘅政改方案，唯一唔同係連激進泛民都加入聯署行列，令泛民廿七人罕有齊齊簽署呢份聲明，當中獨立議員黃毓民其後再發表個人聲明，表明泛民否決政改，萬勿走數嘅訊息。

不過，政圈不只一次有風聲傳出有四名泛民會「轉軚」，即由反對變為支持政改方案，加上同上次類似政改承諾書相隔幾個月，難免令人懷疑泛民陣營有人嘅取態「被動搖」。

事實上，多名被視為政府熱門撬票對象嘅議員，例如公民黨湯家驊、法律界郭榮鏗、教育界葉建源同衞生服務界李國麟四人，佢哋不約而同有份聯署，冇現身今次記者會；至於民協馮檢基即使有親自現身，但影完大合照後就急急腳走人，令人懷疑以上多人係咪有意冇意間，向有心人發放某些訊息？

長毛警告 轉軚「不得好死」

除此以外，泛民不同黨派嘅分歧亦隨處可見，其中社民連梁國雄講明，現時無需再同中央談判，如果邊個轉軚就「不得好死、一世為奴」，同時警告邊個再上京談判，就唔好自稱泛民。

不過另一邊廂，公民黨梁家傑同民主黨劉慧卿話，如果會面無任何前設，佢哋兩黨都樂意同京官溝通，而巧合地，正在北京嘅「內地護法」、基本法委員會委員饒戈平下月會到香港出席同基本法有關研討會，未知到時會否係適合溝通時機。

隨着政改討論進入關鍵嘅最後三個月，無論溫和泛民嘅溝通路線有冇出路，泛民內部嘅「捉鬼」同箍實啲票力度亦會加大，相信未來將會好戲連場。