中環出更:九議員到德 去廁所嫌收費貴

九名立法會議員本月初應邀到德國考察,期間佢哋坐長途車由德國柏林去不來梅途中,數名議員人有三急想去洗手間,發覺喺德國去洗手間要畀七毫子歐元,即折合約港幣六元,但身上又無散紙,卒之要逐一向代表團團長劉慧卿求助借一歐元,之後又集合「回水」先肯買少少嘢,如果畀德國人知道咗香港班立法會議員,連去洗水間都疑嫌貴,認真貽笑大方。

要畀港紙六蚊

建制派議員陳克勤尋日喺社交網站自爆此事始末,話說有次要去油站附近個洗手間,點知要畀七毫子歐元,但多名議員都無散紙喺身,最終要靠卿姐借錢,而由於洗手間外有入閘機,有網民留言講笑話,估唔到一班議員要靠卿姐先可以「入閘」。

咁都未算,眾人洗手間後獲五毫子歐元嘅購物劵「回水」,吸引佢哋喺附近便利店內消費,點知月入約九萬元嘅多名立法會議員,據聞竟然唔想蝕底,眾人夾埋幾張五毫子歐元購物劵,買咗一包可樂糖上車食。其實呢次德國代表團全程由德國有關方面出錢,多名議員連少少消費都唔捨得,真係令人摸不着頭腦嘞!

卓妮

第一手消息請下載on.cc東網iPhone/iPad/Android/Windows Phone Apps