中環出更：馮利是必儲 曉得捐錢
農曆正月十五過去，相信大家陸續拆利是計劃點用，卓妮早前喺香港八和會館舉辦新春團拜酒會見到一批政商界名人，佢哋大談那些年點用利是錢，其中百仁基金副主席羅詠詩（Anthea）笑言自細已係「算死草」，計住啲利是錢點用最好，而自十六歲開始有利是錢嘅運用權後，Anthea就用嚟投資銀行股，又透露依家會幫兩個囝囝，將啲利是錢用嚟投資唔同基金及股票，認真精打細算。
羅詠詩自嘲「算死草」
同場嘅民政事務局常任秘書長馮程淑儀（Betty）話，由細到大都係媽媽幫佢儲喺銀行，中學時全數畀返佢後，就攞嚟買晒書睇，將啲利是錢用喺個人知識增長上。Betty又話，依家每年都有幫十二歲嘅女兒存啲利是錢入銀行，不過就唔會幫佢投資，費事蝕咗唔知點交代。
民政事務局副局長許曉暉（Florence）則指，自中學畢業後重掌利是錢使用權，未有買嘢或投資，而係捐晒畀慈善團體，就連依家佢女兒都係同一做法，每年將一半利是錢捐畀唔同嘅慈善機構，另一半就儲起。Florence坦言，捐咗去既幫到人，心靈又滿足，何樂而不為。
當日出席酒會嘅仲有身為主人家嘅八和主席汪明荃、康文署副署長吳志華、香港演藝學院校長華道賢、東華三院主席施榮恆等，其中施榮恆同互聯網專業協會會長洪為民異口同聲話，冇印象以前啲利是錢用咗去邊，一句到尾，似乎都係一早不知所終啦！
卓妮