野豬林驚現鬧市 漁護署欺軟怕硬

香港人愛心爆棚,流浪貓、流浪狗有人餵養,連流浪野豬都一樣有人服侍,卒之搞到野豬嘅領地同人類生活環境嘅界限愈來愈模糊,其中北角更加變成「野豬林」添,真係唔到你唔服。

唔係吹水o架。野豬大軍前日攻陷北角百福道,仲一家大細出動開大餐添,淨係小野豬就有十隻,唔使問阿貴,附近一定有大野豬出沒。嗱,小野豬就話得意啫,大野豬長嘴獠牙就唔同嘞,惡起上嚟真係唔講得笑o架。你知啦,附近有好多學校,萬一有小朋友畀野豬咬傷就大件事咯。

野豬為患,照計漁護署應該做嘢,一係將野豬趕回山林,一係幫野豬做絕育手術,控制數量。可惜吖,雖然街坊多次向漁護署投訴,但對方好似借咗聾耳陳隻耳,求其派人視察下就當交差。漁護署既唔捉又唔閹,加上有市民餵佢哋食嘢,野豬家族咪開枝散葉囉。漁護署一二年收到四宗野豬出沒北角嘅報告,舊年大幅增加六倍去到廿八宗。當年貪曾叫市民生三個,人類唔聽佢支笛,反而野豬聽晒佢話,多子多福,唔通有人除咗識「狗噏」,仲識豬噏?

講真,野豬出沒唔單止對居民造成滋擾,野豬本身都好易出意外。近日有的士撞倒野豬後不顧而去,警方正追緝肇事司機。其實計功夫茶話齋,同樣應該追緝嘅仲有漁護署官僚,如果唔係佢哋唔嗲唔吊,闊佬懶理,野豬家族就唔會繁衍眾多通街亂走,官不傷野豬,野豬因官而傷,你話係咪罪過吖。

不過有樣嘢要同大家研究吓。咪睇漁護署人員對窮兇極惡嘅野豬束手無策,佢哋對普通流浪貓狗落手好重o架。幾年前網上瘋傳一段短片,漁護署捉狗隊用頸圈將兩隻唐狗勒到實一實,搞到滿地鮮血,非常之咁兇殘。唔講唔知,原來咁樣慘死嘅流浪貓狗,每年有近兩萬隻,你話漁護署官僚唔係欺狗怕豬,講都冇人信喇。

提起漁護署嘅醜事,真係三日三夜都數唔晒。有次警方破獲走私集團,救出百幾隻受法例保護嘅五爪金龍,點知漁護署以「健康欠佳」為理由,通通殺光。又有一次裝修公園,數百隻烏龜交畀漁護署照顧,結果又係一隻都冇得留低。漁護署淪為動物殺手,唔怪得畀人改名做「漁害署」喇。

《水滸傳》裏面嘅林沖落難野豬林,仲有魯智深出手相救,現實生活中香港變咗野豬林,唔止市民受威脅,野豬亦隨時被車撞死,你話點算好?不如咁喇,野豬們一於包圍佔領漁護署署長黃志光屋企,咁官老爺就肯出手解決問題o架嘞!