政情：鄉紳民記提早開戰互搶地盤
新界鄉議局有意籌組新界黨壯大聲勢，唔想再好似之前選舉咁幫民建聯（民記）抬轎，近年更屢傳鄉紳不滿民記淨係識攞着數，據聞有鄉紳想同民記爭奪下屆北區區議會主席之位。民記眼見鄉事派來勢洶洶，加上明年新一屆區議會將取消委任制，民記為保議席有意爭奪沙頭角鄉事委員會（鄉委會）主席之位，希望循此路重返區會任當然委員，力保區會主席之位，意味雙方提早開戰。
侯獲撐選北區區會主席
二十七個鄉委會本月起開始換屆，上水鄉委會主席侯志強相信坐定粒六連任，同時據聞侯志強嘅野心不止於此，有鄉紳就支持佢進攻北區區會主席，單挑現任主席、來自民記嘅蘇西智。民記現時坐擁北區區議會十二席，佔所有議席一半，鄉紳勢力緊隨其後。有村民坦言，隨着北區區議會取消三個委任議席，只要鄉紳爭氣啲全取新增民選議席，牌面上絕對有機會爭贏做區議會主席，進一步削弱民記喺新界嘅力量。
民記爭沙頭角鄉會還擊
我哋聽聞侯志強不但瞄準北區區議會主席，就連五月換屆嘅鄉議局副主席之位都有意染指，勢要取代同蘇西智一樣來自民記陣營嘅現任副主席張學明喎！對於有傳會更上一層樓，侯志強話自己對政治冷感，擔心爬得愈高，跌番落嚟斷手斷腳就唔好啦，好好哋做上水鄉委會主席就於願足矣。真係信不信由你。
不過，無論係真定係假都好，民記都不甘白白斷送北區區議會主席之位，據聞該黨有殺錯無放過，決定派出沙頭角鄉委會前主席劉天生挑戰現任主席李冠洪，希望劉天生重返北區區議會任當然議員，喺下屆區議會主席選舉上，幫民記箍得一票得一票。嚟緊鄉委會、鄉議局同區議會換屆，鄉事派同民記肯定好戲連場，有興趣嘅人真係買定花生等睇戲都得喇！