中環出更：樹根寸佔中：要威又戴頭盔
區議會選舉年底就舉行，有多年區議會經驗嘅立法會議員鍾樹根，日前接受黨友蔣麗芸（Ann）訪問時，被問到做咗咁多年區議員，有咩事情最自豪。樹根就憶述九二年曾帶領漁民佔領中環海港兩個鐘，抗議填海影響漁民生計，仲爭啲搞到政府要開槍添，好彩最後和平解決。樹根豪言當時「死就死」，寸爆上年嘅佔領人士「又要威，又要戴頭盔」！
曾率漁民「冒死」維港抗爭
樹根話，當年玫瑰園基建計劃要挖沙填海，漁民因此失去生計，於是搵咗啱啱當選區議員嘅佢求助。其實當時政府已將計劃刊憲咗一年，奈何漁民唔識字，所以睇唔到。佢曾經搞過一連串海上大遊行、封鎖海港抗議，仲一度佔領中環海港兩個鐘，希望幫漁民爭取賠償，但政府嘅態度都好強硬，仲話漁民一過警戒線就會開槍。
好彩當時有立法局議員肯做和事老，政府開會後亦承認溝通不足，最終決定賠償漁民二億五千萬元，樹根自此被當成漁民一分子，搞到依家都搣唔甩「漁民」身份。
卓妮